Cwrs Cymraeg newydd i gryfhau gofal i gleifion

Bydd yr Ysgrifennydd Iechyd, Jeremy Miles yn lansio Cwrs Croeso yn swyddogol yn yr Eisteddfod Genedlaethol yn Wrecsam heddiw.

Mae'r cwrs wedi'i ddatblygu gan y Ganolfan Dysgu Cymraeg Genedlaethol, yn benodol ar gyfer staff iechyd a gofal cymdeithasol. Bydd yn cyflwyno geiriau ac ymadroddion allweddol y gall staff eu defnyddio yn eu sgyrsiau bob dydd gyda chleifion a defnyddwyr gwasanaethau sy'n siarad Cymraeg.

Mae hyn yn cynnwys sut i roi geiriau o gysur, cynnig lluniaeth, neu ynganu enwau Cymraeg – sydd i gyd yn gallu gwella profiad person o ofal yn sylweddol.

Mae'r cynllun yn rhan bwysig o gyflawni'r uchelgais yn Mwy na geiriau – cynllun iaith Gymraeg cynhwysfawr Llywodraeth Cymru ar gyfer iechyd a gofal cymdeithasol.

Mae Mwy na geiriau yn cefnogi ac yn datblygu sgiliau Cymraeg y gweithlu iechyd a gofal cymdeithasol, nawr ac yn y dyfodol, fel bod yr iaith yn rhan annatod o wasanaethau ledled Cymru.

Mae hyn yn allweddol i ddiwallu anghenion iaith pobl sy'n cael gofal, heb iddyn nhw orfod gofyn amdano.

Wrth siarad yn yr Eisteddfod Genedlaethol, bydd yr Ysgrifennydd Iechyd yn dweud nad oes angen i staff iechyd a gofal cymdeithasol fod yn rhugl yn y Gymraeg i wneud gwahaniaeth ystyrlon i ofal pobl.

Dywedodd yr Ysgrifennydd Iechyd, Jeremy Miles: "Nod Mwy na geiriau – ein cynllun iaith Gymraeg ar gyfer iechyd a gofal cymdeithasol – yw sicrhau bod pobl sy'n siarad Cymraeg yn gallu cael gafael ar y gofal sydd ei angen arnyn nhw, yn eu dewis iaith.

"Mae ychydig o eiriau Cymraeg yn unig yn gallu gwneud gwahaniaeth mawr i brofiadau pobl.

"Mae'n haws nag erioed i bobl sy'n newydd i'r Gymraeg ddechrau dysgu'r iaith, diolch i'r pecyn o adnoddau dysgu, ac rwy'n falch iawn bod Cwrs Croeso yn rhan o'r pecyn hwnnw."

O dan Mwy na geiriau, mae disgwyl i bob aelod o staff iechyd a gofal cymdeithasol yng Nghymru gyrraedd lefel "cwrteisi" sylfaenol yn y Gymraeg erbyn 2027.

Mae Cwrs Croeso yn cynnwys adnodd digidol sy'n nodi'r rhesymau dros ddefnyddio'r Gymraeg a chyflwyniad i dermau a geirfa syml i'w defnyddio gyda chleifion.

Mae tîm o Diwtoriaid Dysgu Cymraeg hefyd ar gael i ddarparu gweithdai "Croeso" i ddechreuwyr.

Mae'r cwrs yn rhan o raglen eang o hyfforddiant Cymraeg ar gyfer y sector iechyd a gofal cymdeithasol, dan arweiniad y Ganolfan Dysgu Cymraeg Genedlaethol.

Ychwanegodd Dona Lewis, Prif Weithredwr y Ganolfan Dysgu Cymraeg Genedlaethol: "Bydd y Cwrs Croeso newydd hwn, sydd wedi'i ddatblygu gan arbenigwyr dysgu iaith y Ganolfan, yn helpu gweithwyr iechyd a gofal i ddefnyddio mwy o Gymraeg gyda chleifion a gofalwyr.

"Bydd cymorth ychwanegol dan arweiniad tiwtoriaid yn galluogi gweithwyr i gryfhau eu sgiliau, a bydd opsiynau dysgu pellach ar gael hefyd.

"Ry'n ni'n gwybod bod darparu gwasanaethau drwy gyfrwng y Gymraeg yn gallu gwneud gwahaniaeth gwirioneddol i gleifion a'u teuluoedd, ac ry'n ni'n edrych ymlaen at barhau i helpu'r gweithlu i ddatblygu eu sgiliau iaith."