English icon English
Cabinet Secretary for Finance and Welsh Language - Mark Drakeford
Welsh Language

Cymorth gan Lywodraeth Cymru i brosiectau Cymraeg newydd

New Cymraeg projects to get Welsh Government support

Bydd 15 grŵp cymunedol yn cael hyd at £10,000 yr un i droi eu syniadau yn brosiectau hyfyw i gynnal y Gymraeg yn eu cymunedau.

Ers ei sefydlu yn 2022, mae Perthyn, cynllun grantiau bach Llywodraeth Cymru wedi helpu 62 o brosiectau cymunedol.

Mae tref Llanrwst wedi sicrhau grant gwerth hyd at £10,000 i helpu'r gymuned leol i brynu Bys a Bawd, y siop lyfrau sydd wedi gwasanaethu'r gymuned ers 50 o flynyddoedd. Mae'r Gymraeg wedi bod yn ganolog i'r busnes, ac yn awr, mae'r gymuned yn bwriadu prynu a thrawsnewid y gofod yn ganolfan lenyddol.

Nod Perthyn yw helpu cymunedau Cymraeg sydd â niferoedd uchel o ail gartrefi drwy sicrhau cyfleoedd economaidd, darparu tai fforddiadwy, a helpu gwead cymdeithasol y gymuned leol, ac yn naturiol, y Gymraeg sy'n rhan annatod o'r prosiectau. 

Dywedodd Ysgrifennydd y Cabinet dros Gyllid a'r Gymraeg, Mark Drakeford:

"Mae grantiau bach yn gallu gwneud gwahaniaeth mawr i'n cymunedau. Mae'n wych gweld cymaint o brosiectau yn y rownd hon o gyllid Perthyn, sy'n cynnwys prosiect ynni cynaliadwy a chymunedau'n dod at ei gilydd i brynu a rhedeg eu tafarnau, siopau, llyfrgelloedd a chapeli lleol i geisio sicrhau budd i'w cymunedau. Rydyn ni hefyd wedi helpu nifer o brosiectau sy'n cael eu harwain gan gymunedau i greu tai fforddiadwy i alluogi pobl i fyw yn eu cymunedau lleol."

Caiff y grant ei weinyddu gan Cwmpas ar ran Llywodraeth Cymru.

Dywedodd Jocelle Lovell, Cyfarwyddwr Cymunedau Cynhwysol Cwmpas:

"Rydyn ni'n falch iawn o gael gweithio gyda Llywodraeth Cymru a Planed i gyflawni'r prosiect Perthyn. Mae Perthyn yn gweithio gyda'r cymunedau i nodi ffyrdd o fynd i'r afael â'r diffyg tai fforddiadwy, gwarchod asedau cymunedol a chreu cwmnïau cydweithredol a busnesau cymdeithasol newydd. Mae gweinyddu cynllun grantiau bach ar gyfer y cymunedau i helpu i feithrin gallu lleol a sbarduno eu syniadau o ran busnes a thai wedi bod yn hwb gwirioneddol i ni. Rydyn ni'n edrych ymlaen at weld y syniadau'n datblygu ac at weithio gyda rhagor o gymunedau yn ystod y misoedd nesaf."

Os ydych chi'n grŵp cymunedol mewn cymuned Gymraeg ac eisiau cymorth pellach i droi eich syniadau'n brosiectau hyfyw, cysylltwch â Cwmpas: Perthyn - Cwmpas

Nodiadau i olygyddion

Manylion llawn y prosiectau:

  1. Ymddiriedolaeth Tir Bro'r Ffynnon – £10,000 – Llanystumdwy, Gwynedd – Cymuned sy'n edrych ar dai fforddiadwy.
  2. Bys a Bawd Pawb – £10,000 – Llanrwst, Conwy – Cymuned sy'n edrych ar brynu a rhedeg siop lyfrau Bys a Bawd yn Llanrwst. 
  3. Deryn Du – £8,500 – Ceredigion – Cymuned sy'n edrych ar dai fforddiadwy.
  4. Menter Gymunedol Llanuwchllyn – £10,000 – Gwynedd – Cymuned sy'n edrych ar dai fforddiadwy.
  5. Menter y Ring – £9,632 – Gwynedd – Cymuned sy'n edrych ar brynu a rhedeg tafarn Brondanw.
  6. Llanfywio – Ysgol Llannefydd – £10,000 – Conwy – Cymuned sy'n edrych ar ddod â'r hen ysgol i berchnogaeth y gymuned a'i thrawsnewid yn dai fforddiadwy.
  7. Dyffryn Peris – £9,899 – Gwynedd – Cymuned sy'n edrych ar dai fforddiadwy.
  8. Dyfodol Salem Gâr – £10,000 – Sir Gaerfyrddin – Cymuned sy'n edrych ar greu canolfan gymunedol.
  9. Hwb Penmachno – £10,000 – Conwy – Cymuned sy'n edrych ar dai fforddiadwy.
  10. Cwmni Nod Glas Cyf – £9,998 – Dinas Mawddwy – Busnes a arweinir gan y gymuned.
  11. Pwyllgor Pentra Deiniolen – £9,950 – Gwynedd – Cymuned sy'n edrych ar brynu hen adeilad y llyfrgell a'i redeg yn ganolfan gymunedol.
  12. Hwb Llansaint – £9,932 – Sir Gaerfyrddin – Trosglwyddo asedau i'r gymuned.
  13. Gweithgor Dyffryn Aeron – £10,000 – Ceredigion – Prosiect ynni a arweinir gan y gymuned.
  14. Canolfan Bethlehem – £10,000 – Trefdraeth – Cymuned sy'n edrych ar brynu capel i greu gofod cymunedol a thai fforddiadwy.
  15. Hwb Aberteifi – £9,050 – Aberteifi – Cymuned sy'n edrych ar brynu hen Gapel y Tabernacl a'i redeg yn ganolfan gymunedol.