Cyrhaeddiad byd-eang Cymru yn ymestyn ymhell i’r Dwyran Canol
Wales’ global reach extends far to the Middle East
Mae Gweinidog yr Economi, Ken Skates wedi dweud bod cennad newydd Llywodraeth Cymru i'r Emiraethau Arabaidd Unedig yn chwarae rhan allweddol yn y gwaith o gryfhau presenoldeb Cymru ar draws y byd.
Bydd penodi Paul Gyles yn helpu i sbarduno buddsoddiad cyfalaf a chyfleoedd allforio ac yn hyrwyddo allforion o Gymru i'r Emiraethau Arabaidd Unedig sy'n ganolfan fusnes fyd-eang bwysig.
Mae Paul yn Gyfrifydd Rheoli Siartredig (CIMA) gyda dros 30 mlynedd o brofiad yn gweithio gyda chwmnïau sy'n arwain y farchnad ledled y DU, y Dwyrain Canol ac Asia. Mae wedi byw yn Dubai yn yr Emiraethau Arabaidd Unedig ers 2003 a dyma'r pedwerydd cennad i'w benodi gan Lywodraeth Cymru ers lansio'r strategaeth ryngwladol sy'n ceisio codi proffil y genedl ledled y byd.
Drwy weithio gydag unigolion sefydledig a phroffil uchel, mae Llywodraeth Cymru yn gobeithio sbarduno a chynyddu cysylltiadau â’r boblogaeth Gymreig sydd ar wasgar, sy'n cynnwys cyn-fyfyrwyr a chyfeillion Cymru mewn gwledydd eraill.
Dywedodd Ken Skates, Gweinidog yr Economi:
"Mae hwn yn gyfnod heriol ac yn un pan ydym i gyd yn ceisio ymdrin â’r cyfleoedd, yr heriau a’r cymhlethdodau sy’n deillio o’r DU yn ymadael â’r UE a'r anawsterau parhaus sy'n gysylltiedig â pandemig y coronafeirws.
"Bydd Paul yn hyrwyddo rhinweddau Cymru fel partner masnachu o'r radd flaenaf, cyrchfan twristiaeth ragorol, partner diwylliannol amrywiol a lle gwych i fyw, astudio a gwneud busnes ynddo.
"Mae ein Cynllun Gweithredu ar yr Economi yn glir ynglŷn â'n hymrwymiad i flaenoriaethu allforion a masnach, ac i helpu busnesau i gadw eu partneriaid masnachu presennol tra'n dechrau ar farchnadoedd byd-eang eraill. Nid oes amheuaeth nad yw'n farchnad hynod arwyddocaol ac yn un sydd â llawer i'w gynnig i'n hallforwyr."
Dywedodd Paul Gyles FCMA CGMA:
"Mae'n anrhydedd i mi gael fy mhenodi'n Gennad i Lywodraeth Cymru a fydd yn cynrychioli Cymru yn y Dwyrain Canol. Byddaf yn gwneud fy ngorau i helpu i hyrwyddo Cymru yn y rhanbarth hwn, o ran ysgogi cyfleoedd buddsoddi cyfalaf i Gymru, yn ogystal â chefnogi cwmnïau sy'n ceisio allforio i'r rhanbarth hwn.
"Mewn amgylchedd economaidd mor heriol mae'n gyfnod cyffrous iawn i agor drysau newydd i fusnesau ac rwy'n hynod falch o fod yn rhan o ddatblygiad rhwydwaith busnes Cymru ar draws y byd."