Ffermwyr Cymru i gael Mynediad at Fenthyciadau Gwyrdd Llog Isel

Bydd y Cynllun Benthyciadau Amaethyddiaeth Gynaliadwy (SALS) yn cynnig benthyciadau wedi'u cymell ar gyfradd llog sefydlog o 3%, y gellir eu had-dalu dros hyd at 15 mlynedd, i helpu ffermydd bach a chanolig i fuddsoddi mewn effeithlonrwydd ynni, rheoli gwastraff a gwelliannau cynhyrchiant. Bydd hyd at £5 miliwn ar gael yn ystod blwyddyn ariannol 2026/27, gyda'r potensial i ymestyn y cynllun yn dibynnu ar y galw. 

Bydd ffermydd yn gallu benthyca rhwng £25,000 a £1 miliwn fesul prosiect. Mae gwyliau ad-dalu o chwe mis ar ddechrau'r benthyciad yn rhoi amser i fusnesau weld manteision eu buddsoddiad cyn i ad-daliadau ddechrau. Mae opsiynau talu tymhorol hefyd yn cael eu hystyried. 

Mae SALS yn gwneud dewis polisi clir: dylid defnyddio cyllid cyhoeddus fel offeryn ad-daladwy, wedi'i dargedu i yrru arferion ffermio cynaliadwy — gan ategu grantiau presennol Llywodraeth Cymru. 

Dywedodd y Dirprwy Brif Weinidog sy'n gyfrifol am Newid Hinsawdd a Materion Gwledig, Huw Irranca-Davies:

"Rwy'n falch ein bod yn gallu gweithio gyda Banc Datblygu Cymru ar y cynllun newydd hwn a fydd yn ffordd arall o gefnogi busnesau ffermio Cymru i foderneiddio a pharhau i fod yn gynaliadwy yn ariannol."

Giles Thorley yw Prif Weithredwr Banc Datblygu Cymru. Dywedodd:

"Mae cefnogi busnesau fferm gyda phecynnau cyllido amyneddgar a hyblyg yn hanfodol ar gyfnod o lawer o newid yn y sector. Edrychwn ymlaen at weithio'n agos gyda ffermwyr Cymru i gefnogi prosiectau newydd sy'n eu galluogi i 'fuddsoddi i arbed' a gwella eu darpariaeth ffermio cynaliadwy yn y dyfodol."

Bydd y cynllun yn cael ei alinio â dyletswyddau Rheoli Tir Cynaliadwy Cymru yn ogystal â gweithio mewn ffordd ategol gyda chyflwyno'r Cynllun Ffermio Cynaliadwy. 

Bydd y peilot yn rhedeg am 12 mis i ddechrau.

Mae rhagor o wybodaeth, a'r cyfle i fynegi eich diddordeb, ar gael gan Fanc Datblygu Cymru.