Ffermwyr Cymru yn cael eu hannog i barhau i gadw llygad am arwyddion o'r Tafod Glas

Nid yw'n effeithio ar bobl na diogelwch bwyd. Mae'r feirws yn cael ei drosglwyddo'n bennaf gan bigiadau gwybed ac mae'n effeithio ar wartheg, geifr, defaid a chamelod fel lamas, ac mae gwybed yn fwyaf amlwg rhwng Ebrill a Thachwedd.

Mae'r Tafod Glas yn glefyd hysbysadwy, felly dylai pobl roi gwybod i’r Asiantaeth Iechyd Anifeiliaid a Phlanhigion ar unwaith os oes ganddyn nhw unrhyw amheuon.

Mae rhagor o wybodaeth am arwyddion clinigol y tafod glas a'r camau i'w cymryd ar gael yma: (Feirws y Tafod Glas (BTV) | LLYW.CYMRU)

Gall yr effeithiau ar anifeiliaid bregus amrywio'n fawr – nid yw rhai yn dangos unrhyw arwyddion clinigol nac effeithiau o gwbl, i eraill gall achosi problemau cynhyrchiant fel llai o gynnyrch llaeth neu golledion wrth atgenhedlu, tra yn yr achosion mwyaf difrifol gall fod yn angheuol i anifeiliaid heintiedig.

Gall ffermwyr helpu i atal y clefyd trwy:

• sicrhau bod da byw yn dod o ffynonellau cyfrifol
• ‌cadw at fesurau bioddiogelwch llym ar eich safle
• parhau i fod yn wyliadwrus

Dylai ceidwaid sy'n ystyried mewnforio anifeiliaid neu gynhyrchion biolegol, er enghraifft plasm cenhedlu, o wledydd y mae BTV yn effeithio arnynt neu o barthau rheoli clefydau yymgynghori â'u milfeddyg i wirio a oes ganddynt hawl i wneud hyn, ac ar y risgiau o wneud hynny. Dylid gwneud hyn bob amser cyn penderfynu mewnforio neu symud anifeiliaid.

Dylai fod gan bob busnes gynllun wrth gefn ar gyfer ymateb i achosion o glefydau ar eu safle ac os gallent fod mewn ardal rheoli clefydau. Dylai cynlluniau wrth gefn gynnwys manylion lle mae anifeiliaid yn cael eu lladd fel arfer i wirio bod lladd-dy wedi'i ddynodi.

Dywedodd Richard Irvine, Prif Swyddog Milfeddygol Cymru: "Wrth i ni fynd i mewn i'r cyfnod hwn lle mae anifeiliaid mewn mwy o berygl o'r Tafod Glas o wybed, byddwn yn annog pob ceidwad i weithredu nawr i ddiogelu eu buchesi a’u diadellau i gadw clefydau allan, i fod yn ymwybodol sut i adnabod y Tafod Glas - ac i roi gwybod am unrhyw amheuaeth o achosion ar unwaith.

"Dyw Cymru erioed wedi cael achos o'r Tafod Glas - ond - gydag achosion yn y gorffennol yn Lloegr ac yn Ewrop rydyn ni'n annog pobl i fod yn wyliadwrus ac i baratoi ar gyfer sefyllfa ble y gallai’r Tafod Glas godi eto.”   

Os oes gennych unrhyw amheuon fod y tafod glas ar eich anifeiliaid, cysylltwch â'ch swyddfa Asiantaeth Iechyd Anifeiliaid a Phlanhigion (APHA) leol ar 0300 303 8268 ar unwaith. Bydd milfeddygon yr Asiantaeth yn archwilio yr achosion a amheuir.

Mae rhagor o wybodaeth ac adnoddau ar y sefyllfa bresennol o ran y tafod glas hefyd ar gael ar wefan Ruminant Health & Welfare.