£10m ar gyfer prosiectau ynni cymunedol i bweru dyfodol gwyrdd Cymru

Heddiw, mae Llywodraeth Cymru wedi cyhoeddi cynllun grant cyfalaf newydd gwerth £10m i helpu i ddatblygu Systemau Ynni Lleol Clyfar (SLES) ledled Cymru. Mae'r fenter hon yn gam pwysig at wireddu amcan Cymru o gynhyrchu 100% o'i thrydan o ffynonellau adnewyddadwy erbyn 2035 gan roi'r grym i gymunedau i reoli ynni eu dyfodol.

Mae'r cynllun grant yn agored i sefydliadau ynni cymunedol, mentrau cymdeithasol, cyrff sector cyhoeddus a busnesau bach a chanolig. Caiff ymgeiswyr eu hannog i ddatblygu prosiectau arloesol sy'n integreiddio cynhyrchu ynni, storio ynni a seilwaith ynni yn eu hardaloedd, i wneud systemau ynni yn fwy effeithlon ac i sicrhau manteision lleol, gan gynnwys costau ynni is.

Dywedodd Ken Skates, Ysgrifennydd y Cabinet dros yr Economi ac Ynni: "Mae'r cynllun grant £10m hwn yn rhan ganolog o'n hymdrechion i ddatgarboneiddio ynni Cymru a sicrhau bod ein cymunedau'n profi manteision y pontio hwn.

"Gyda chostau ynni yn cyfrannu at yr argyfwng costau byw, gall y prosiectau hyn leihau'r angen am seilwaith ynni mawr a datblygu system ynni lleol fwy gwydn."

Drwy roi prosiectau SLES ar waith ledled Cymru, bydd Llywodraeth Cymru yn meithrin dealltwriaeth werthfawr o raddfa'r manteision y gellir eu sicrhau i gymunedau. Bydd yr wybodaeth hon yn helpu Ynni Cymru i fireinio ac ehangu'r systemau hyn er mwyn sicrhau eu bod yn cael yr effaith fwyaf posibl ar draws y wlad.

Dywedodd Mr Skates: "Rwy'n annog partïon sydd â diddordeb i fanteisio ar y cyfle hwn a gwneud cais am y cyllid. Gyda'n gilydd, gallwn arwain y ffordd at greu Cymru wyrddach a thecach."

Cafodd Ynni Cymru ei sefydlu gan Lywodraeth Cymru yn 2023, a nod y rhaglen yw sicrhau bod buddion cynhyrchu ynni yn cael eu cadw'n lleol, gan hyrwyddo perchnogaeth leol o asedau ynni adnewyddadwy integredig mewn dwylo lleol fel strategaeth ganolog wrth bontio i economi carbon isel.

Am ragor o wybodaeth ac i wneud cais, ewch i: https://www.llyw.cymru/ynni-cymru-rhaglen-ariannu-grant-cyfalaf-2024-i-2025