£10m i gefnogi prosiectau ynni dan arweiniad y gymuned ledled Cymru

Mae cynllun grantiau cyfalaf Ynni Cymru gwerth £10m yn rhan allweddol o nod uchelgeisiol Cymru i gynhyrchu 100% o'i thrydan o ffynonellau adnewyddadwy erbyn 2035.

Mae'n darparu cymorth ariannol i sefydliadau ynni cymunedol, mentrau cymdeithasol, cyrff sector cyhoeddus, a busnesau bach a chanolig sy'n datblygu prosiectau ynni lleol arloesol.

Mae'r cynllun grant yn adeiladu ar waith Ynni Cymru, a sefydlwyd gan Lywodraeth Cymru yn 2023, i hyrwyddo perchnogaeth gymunedol ar ynni adnewyddadwy a llywio'r broses o drawsnewid Cymru i economi carbon isel.

Dywedodd Ysgrifennydd y Cabinet dros yr Economi, Ynni a Chynllunio, Rebecca Evans:

"Mae'r buddsoddiad hwn gwerth £10 miliwn yn dangos ein hymrwymiad parhaus i roi cymunedau wrth wraidd y gwaith o drawsnewid Cymru i ynni glân.

“Nid yw Systemau Ynni Lleol Clyfar yn ymwneud â datgarboneiddio ein cyflenwad ynni yn unig – maent yn ymwneud â chostau ynni is, creu swyddi lleol, a seilwaith ynni mwy gwydn i gymunedau lleol.

"Rwy'n falch iawn o agor ceisiadau ar gyfer y cylch ariannu nesaf ac rwyf am annog sefydliadau ledled Cymru i gyflwyno eu cynigion arloesol.”

Mae effaith y cynllun i'w weld yng Nghlwb Pêl-droed Treffynnon yn Sir y Fflint lle mae'r clwb wedi trawsnewid ei seilwaith ynni gyda diolch i gyllid yn ystod y cylch ariannu diwethaf.

Roedd y grant yn caniatáu i'r clwb ychwanegu paneli solar ffotofoltäig ar y to, batris storio, pympiau gwres o'r aer, mannau gwefru cerbydau trydan, llifoleuadau LED clyfar, a system ddeallus ar gyfer rheoli ynni.

Mae'r dull integredig hwn yn golygu ei fod yn disgwyl gostyngiad o 80% mewn costau ynni blynyddol – arbedion sy'n cael eu hail-fuddsoddi mewn chwaraeon llawr gwlad a mentrau cymunedol.

Dywedodd Cyfarwyddwr Clwb Pêl-droed Treffynnon, Tracey Jones:

“Rydym wedi adeiladu sylfaen gadarn a gwaddol sy'n cefnogi pobl leol yn ardal Treffynnon ac yn ehangach ac rydym yn ddiolchgar am gymorth y gronfa tuag at ein cynaliadwyedd hirdymor.

“Tra bod y cam hwn yn dod i ben, mae taith y clwb yn parhau. Edrychwn ymlaen at adeiladu ar y momentwm hwn, ehangu ein cyrhaeddiad, a sicrhau bod y clwb yn parhau i fod yn ased parhaol i'r gymuned.

“Mae ein gostyngiad disgwyliedig mewn costau ynni blynyddol hefyd yn ein galluogi i gefnogi chwaraeon a mentrau ar lawr gwlad ymhellach. Ar hyn o bryd mae gennym 155 o fechgyn o 6-17 oed yn chwarae yn y clwb, ac mae gennym dîm Merched newydd ar gyfer y tymor newydd sydd i ddod. Yn ogystal, mae gennym berthynas gref gyda chwmni Achieve More Training sy'n darparu rhaglenni ymgysylltu a chymwysterau ar dir ein clwb pêl-droed, gan gynnig darpariaeth amgen drwy ‘Goodwood’ sydd wedi'i leoli yn ein clwb pêl-droed.”

Ychwanegodd yr Ysgrifennydd Ynni:

“Mae'r llwyddiant yr ydym eisoes wedi'i weld gan y rhai a dderbyniodd grantiau blaenorol yn helpu i gael cipolwg amhrisiadwy ar raddfa'r manteision y gellir eu sicrhau i gymunedau, a fydd yn helpu Ynni Cymru i fireinio ac ehangu systemau i gael yr effaith fwyaf bosibl ledled Cymru.”