£8.1bn i gefnogi seilwaith gwyrdd

Mae'r strategaeth yn cael ei hategu gan fuddsoddiad o fwy na £8.1 biliwn dros y tair blynedd nesaf.

Daw’r datganiad hwn cyn dadl ar y gyllideb ddrafft yn y Senedd yn ddiweddarach heddiw.

Dywedodd Rebecca Evans, y Gweinidog Cyllid a Llywodraeth Leol:

“Gosododd ein cyllideb y sylfeini ar gyfer cryfhau gwasanaethau cyhoeddus, mynd i'r afael â'r argyfwng hinsawdd a’r argyfwng natur, a helpu i greu economi

ddi-garbon. Bydd buddsoddi yn y seilwaith cywir, yn y mannau cywir, yn hanfodol er mwyn taro’r nod.

"Bydd y buddsoddiad yn wahanol o’r naill sector i’r llall ac o’r naill rhaglen i’r llall, ond byddwn ni’n ceisio sicrhau bod yr holl fuddsoddiad yn y dyfodol yn chwarae’i ran o safbwynt helpu Cymru i gyrraedd sero net. Bydd canlyniadau amgylcheddol yn cael eu hystyried ym mhob maes gwariant, hyd yn oed yn y meysydd hynny lle gallai’r ffocws sylfaenol fod yn wahanol.

“Nod cyffredinol ein buddsoddiad fydd mynd i'r afael â'r argyfwng hinsawdd a’r argyfwng natur. Bydd yn sicrhau bod gennym y seilwaith yn ei le i helpu i greu’r Gymru rydyn ni am ei throsglwyddo i genedlaethau'r dyfodol – Cymru gryfach, decach a gwyrddach.”

Rhwng ’nawr a 2025, bydd £770 miliwn ar gael i gefnogi trafnidiaeth gyhoeddus − gyda buddsoddiad o £585 miliwn yn y rheilffyrdd a buddsoddiad o £185 miliwn mewn teithio ar fysiau. Bydd y buddsoddiad hwn yn cael ei ddefnyddio i ddarparu cerbydau mwy newydd a gwyrddach, i barhau i ddatblygu Llinellau Craidd y Cymoedd, ac i gefnogi trafnidiaeth integredig drwy gynlluniau Metro.

Bydd y strategaeth hefyd yn rhoi cymorth i greu Coedwig Genedlaethol, ac yn gwella mynediad i dirweddau a hamdden awyr agored drwy fuddsoddi mewn tirweddau dynodedig a datblygu Llwybr Arfordir Cymru, Llwybrau Cenedlaethol a’r rhwydwaith Llwybrau Tramwy Cyhoeddus. Bydd cyfanswm o dros £153 miliwn yn cael ei wario i gefnogi natur ac amgylchedd Cymru.

Rydym hefyd yn gwarchod rhag effeithiau’r newid yn yr hinsawdd drwy fuddsoddi mwy na £100 miliwn ar amddiffynfeydd rhag llifogydd. Bydd mwy na 45,000 o gartrefi’n elwa ar fesurau ychwanegol i amddiffyn rhag llifogydd yn ystod tymor y Senedd hon, a bydd y Rhaglen Rheoli Perygl Arfordirol yn lleihau’r risg i fwy na 17,400 o gartrefi o amgylch arfordir Cymru.

Dywedodd Lee Waters, y Dirprwy Weinidog Newid Hinsawdd:

“Drwy fuddsoddi mewn seilwaith, byddwn ni’n agor mathau mwy gwyrdd o drafnidiaeth i ragor o bobl, gan roi mwy o ddewis o ran sut byddwn ni i gyd yn teithio. Ac mae’n seilwaith yn fwy na dim ond ein hamgylcheddau adeiledig; rydyn ni’n neilltuo swm sylweddol o gyllid i wella mannau naturiol Cymru, gan gynnwys gwneud hynny drwy'r Goedwig Genedlaethol. Rydyn ni am hyrwyddo cysylltiad pobl â natur a chefnogi’u lles drwy’r cysylltiad hwnnw.

"Mae hwn yn gam arall i'r cyfeiriad cywir, ac rydyn ni’n gwybod bod angen inni wneud mwy yn ystod y deng mlynedd nesaf nag yr ydym wedi'i wneud yn y deng mlynedd ar hugain diwethaf os ydyn ni am gyrraedd ein targed sero net erbyn 2050."