Gweinidog yn clywed am lwyddiant busnes o Sir Ddinbych wrth allforio

          Mae Fifth Wheel yn dylunio ac yn adeiladu carafannau teithiol moethus pum olwyn, ac ef yw'r unig gwmni yn Ewrop sy'n gwneud carafannau pum olwyn sy'n cydymffurfio â gofynion yr UE.

          Ar hyn o bryd, mae allforion yn cyfrif am 50 y cant o'i fasnach ac mae'r cwmni'n bwriadu cynyddu'r ffigur hwnnw.  

          Mae cefnogaeth a gafodd y cwmni oddi wrth arbenigwyr allforio Llywodraeth Cymru wedi bod o gymorth iddo lwyddo. Maen nhw hefyd yn gweithio gyda cholegau lleol i gynnig profiad i fyfyrwyr.

          Galwodd Gweinidog Gogledd Cymru, Lesley Griffiths, heibio i safle'r cwmni yn Rhuallt i glywed am eu llwyddiant ac am y cynlluniau sydd ganddynt ar gyfer y dyfodol. 

          Dywedodd: "Mae wedi bod yn anhygoel clywed am lwyddiant Fifth Wheel wrth allforio.  Roedd hefyd yn dda clywed am y gwaith maen nhw'n ei wneud gyda myfyrwyr lleol, i roi profiad gwaith gwerthfawr iddyn nhw. 

          "Maen nhw'n enghraifft wych o'r busnesau arloesol a medrus sydd gennym yma yn y Gogledd, a dw i'n falch eu bod hefyd wedi gallu manteisio ar raglenni masnach Llywodraeth Cymru i'w helpu i lwyddo wrth allforio."

          Mae Fifth Wheel hefyd yn rhedeg y Tŷ Gwyn, sy'n cynnig llety, bwyty, cyfleusterau sba a champfa ar y safle. Yn ogystal, mae ganddynt Glwb Gwledig Rhuallt, ger y Tŷ Gwyn, sy'n gallu darparu dros o 50 o leiniau ar gyfer carafannau sefydlog a theithiol.

          Ychwanegodd y Gweinidog: "Mae cael gweld yr hyn mae Fifth Wheel wedi'i gyflawni wedi bod yn ysbrydoliaeth a dw i'n dymuno pob llwyddiant iddyn nhw yn y dyfodol."

Dywedodd Gethin Whiteley, Cyfarwyddwr Technegol Fifth Wheel: "Mae'r cymorth oddi wrth Lywodraeth Cymru wedi'n helpu i allforio'n cynhyrchion ledled y byd. Mae allforio wedi cryfhau'n busnes ac wedi caniatáu inni fuddsoddi yn nyfodol The Fifth Wheel Company."

          Yn ystod y dydd, bu'r Gweinidog yn ymweld hefyd â busnesau bwyd Grazed Bakery yn Rhiwabon, Goch and Co yn Wrecsam a Siop Fferm Ystad Penarlâg.