Gweinidog yn falch o weld cwmni Canolbarth Cymru yn tyfu

Cefnogwyd cynlluniau'r cwmni gyda £60,000 gan Lywodraeth Cymru ac mae'n golygu bod eu gyriannau cyffredinol bellach yn cael eu cynllunio a'u cynhyrchu ar safle Control Techniques yn y Drenewydd.

Mae'r cwmni, sy'n rhan o Nidec – gwneuthurwr moduron mwyaf y byd – yn gyflogwr pwysig yng Nghanolbarth Cymru gyda 383 o staff. 

Mae'r newyddion yn adeiladu ar fuddsoddiad blaenorol gan y cwmni yn eu canolfan yn y Drenewydd.

Mae'r 44 swydd newydd wedi'u creu ar ôl i gyfleuster cynhyrchu gael ei gludo ar y ffyrdd a'r rheilffyrdd o Tsieina.

Mae'r symudiad yn allweddol i gynyddu cynhyrchiant yng Nghanolbarth Cymru gyda 1,200 o yriannau i'w gwneud bob dydd i ateb y galw byd-eang.

Mae Llywodraeth Cymru hefyd yn cefnogi'r cwmni ac AMRC Cymru ar brosiect sydd â'r nod o sbarduno gwelliannau cynhyrchiant.

Meddai Gweinidog yr Economi, Ken Skates: "Mae penderfyniad Control Techniques i symud cynhyrchiant i'r Drenewydd i'w groesawu'n fawr ar gyfnod sy'n parhau i fod yn eithriadol o anodd i'n heconomi.

"Mae'r buddsoddiad yn dangos hyder gwirioneddol yn eu gweithlu a bydd nid yn unig yn diogelu swyddi, ond yn creu rhai newydd sy'n newyddion gwych.

"Dwi'n falch bod Llywodraeth Cymru wedi gallu cefnogi'r cwmni a dwi'n edrych ymlaen at weld y cwmni'n mynd o nerth i nerth yng Nghanolbarth Cymru."

Meddai Martyn Cray, Is-lywydd Gweithrediadau Control Techniques: "Drwy gynhyrchu ein gyriannau Comander yma yng Nghymru, rydym wedi profi bod yr arbenigedd a'r gallu i weithredu prosiect o'r maint hwn yma yng Nghymru. Gweithiodd ein timau gweithrediadau mewnol a'n timau cadwyn cyflenwi yn ddiflino i gyflawni'r prosiect, ar amser ac o fewn y gyllideb, a gallwn edrych ymlaen yn awr at arbedion cost sylweddol ynghyd â chreu gwaith newydd yma yn y Drenewydd."