Llywodraeth Cymru yn buddsoddi £2m i drawsnewid Venue Cymru

Bydd yr arian yn cefnogi'r gwaith o adfywio'r lleoliad 30 oed, sydd ar hyn o bryd yn cyflogi 179 o bobl ac yn croesawu dros 300,000 o ymwelwyr bob blwyddyn, gan gyfrannu £38.4 miliwn i economi'r rhanbarth. 

Wedi'i ddyfarnu i Gyngor Bwrdeistref Sirol Conwy drwy raglen Trawsnewid Trefi Llywodraeth Cymru, bydd yr arian newydd yn galluogi gwaith adnewyddu mewnol ac allanol hanfodol.  

Mae'r buddsoddiad diweddaraf hwn yn ychwanegu at y £500,000 a mwy a ddarparwyd eisoes gan raglen Trawsnewid Trefi Llywodraeth Cymru yn 2024–25 i gefnogi gwaith uwchraddio brys ac mae'n rhan o brosiect Dyfodol Venue Cymru ehangach, sef menter gydweithredol sydd hefyd yn cael ei chefnogi gan Gyngor Celfyddydau Cymru. 

Dywedodd Ysgrifennydd y Cabinet dros Lywodraeth Leol a Thai, Jayne Bryant: 

"Mae Venue Cymru yn rhan annatod o fywyd diwylliannol Gogledd Cymru ac yn rhoi hwb hanfodol i economi Llandudno. Mae'r arian hwn yn arwydd o'n hymrwymiad i roi bywyd newydd i'n trefi, gan greu mannau y mae pobl eisiau byw ynddyn nhw, gweithio ynddyn nhw, ac ymweld â nhw.  

"Trwy'r rhaglen Trawsnewid Trefi, rydyn ni'n buddsoddi yn nyfodol ein cymunedau ac yn sicrhau bod lleoliadau eiconig fel Venue Cymru yn parhau i ffynnu." 

Dywedodd Sarah Ecob, Pennaeth Gwasanaeth yr Economi a Diwylliant yng Nghyngor Bwrdeistref Sirol Conwy:

"Rydyn ni wrth ein bodd ein bod wedi derbyn yr arian hwn yn rhan o'r rhaglen Trawsnewid Trefi."

"Bydd y buddsoddiad hwn yn nyfodol diwylliannol ein rhanbarth yn dod â buddion parhaol i gymunedau yn Sir Conwy a thu hwnt am flynyddoedd lawer i ddod. Rydyn ni i gyd yn hynod gyffrous am y prosiect ac yn edrych ymlaen yn frwd at ddechrau arno."

Mae rhaglen Trawsnewid Trefi Llywodraeth Cymru hefyd yn ysgogi gwaith adfywio ehangach ledled Llandudno: 

• Mae £850,000 wedi'i ddyrannu i gynllun a fydd yn troi eiddo gwag hirdymor yn gartrefi y mae mawr eu hangen. 
• Mae £700,000 wedi'i ddyrannu i gefnogi'r gwaith o droi'r hen adeilad M&S yn ganolfan adloniant dan do i deuluoedd, a fydd yn agor yn 2026. 

Ers 2022, mae £100 miliwn wedi'i fuddsoddi ledled Cymru drwy'r rhaglen Trawsnewid Trefi, gyda £57 miliwn arall ar gael i'w ddyrannu yn 2025–26. Mae'r rhaglen yn helpu i greu swyddi, rhoi hwb i economïau lleol, ac ail-ddychmygu y stryd fawr fel rhywle bywiog, defnydd cymysg, i bobl fyw, gweithio a threulio amser hamdden yno. 

Rhaglen gan Lywodraeth Cymru yw Trawsnewid Trefi. Mae'n darparu £100 miliwn i adfywio canol trefi yng Nghymru. Mae canol trefi a dinasoedd yn rhan hanfodol a phersonol o dreftadaeth a chymuned Cymru, ac mae'r rhaglen Trawsnewid Trefi yn ymrwymo i wasanaethu a chysylltu'r bobl sy'n byw, yn gweithio, yn dysgu ac yn treulio amser hamdden ynddyn nhw.

Dolen: Trawsnewid Trefi: cymorth i wella canol trefi: Rhaglen Trawsnewid Trefi | LLYW. CYMRU