"Moment hanesyddol" wrth i reoliadau hinsawdd ac amaethyddiaeth basio
“Historic moment” as climate and agriculture regulations pass
Mae rheoliadau pwysig sy'n sicrhau ymrwymiadau hinsawdd Cymru ac yn galluogi cyflwyno'r Cynllun Ffermio Cynaliadwy wedi'u pasio yn y Senedd.
Heddiw, cymeradwyodd yr Aelodau reoliadau newydd mentrus sy'n atgyfnerthu gweithredu ar yr hinsawdd ac yn trawsnewid cymorth amaethyddol.
Gyda'i gilydd, maent yn gam mawr ymlaen i ymateb Cymru i fynd i'r afael â'r argyfyngau hinsawdd a natur ac yn hyrwyddo rheoli tir a chynhyrchu bwyd yn gynaliadwy.
Disgrifiodd y Dirprwy Brif Weinidog sy'n gyfrifol am Newid Hinsawdd a Materion Gwledig, Huw Irranca-Davies, y foment fel un "hanesyddol i'r amgylchedd yng Nghymru".
Mae Cymru eisoes wedi lleihau ei hallyriadau o fwy na thraean ers 1990. Mae'r rheoliadau hinsawdd newydd yn gosod pedwaredd cyllideb garbon Cymru ar ostyngiad o 73% mewn allyriadau ac yn ei gwneud yn ofynnol i'r drydedd gyllideb garbon gael ei chyflawni'n gyfan gwbl trwy weithredu domestig.
Ar ôl saith mlynedd o ddatblygu, y rheoliadau amaethyddiaeth yw'r cam olaf i sicrhau y gall Llywodraeth Cymru lansio'r Cynllun Ffermio Cynaliadwy ym mis Ionawr. Mae hyn yn rhoi'r sefydlogrwydd a'r gefnogaeth sydd eu hangen ar ffermwyr i fod yn fwy gwydn, cynhyrchiol a chynaliadwy.
Dywedodd y Dirprwy Brif Weinidog:
"Tra bod eraill yn cilio o ymrwymiadau hinsawdd, mae Cymru'n parhau i weithredu.
"Rydym yn cryfhau y gweithredu ar yr hinsawdd ac yn meithrin partneriaeth newydd gyda ffermwyr Cymru a fydd yn diogelu eu busnesau a'n hamgylchedd am genedlaethau i ddod.
"Mae effeithiau newid hinsawdd yn berygl gwirioneddol a phresennol. Mae’r llifogydd diweddar yn Nhrefynwy a ledled Cymru yn ein hatgoffa bod diffyg gweithredu yn golygu biliau ynni uwch, tywydd mwy eithafol, a dyfodol ansicr i'n plant.
"Mae'r rheoliadau hyn yn cyflawni'r gwrthwyneb: biliau rhatach, aer glanach, swyddi gwyrdd newydd, a Chymru fwy diogel, gyda mwy o sicrwydd.
"Mae'r Cynllun Ffermio Cynaliadwy yn cefnogi cynhyrchu bwyd cynaliadwy ac yn ymateb i'r argyfyngau hinsawdd a natur.
"Ein huchelgais yw diwydiant amaethyddol ffyniannus, hyderus sy’n cynnwys arloesedd a thwf.
"Rydym wedi gorffen cyfres o sioeau teithiol yn ddiweddar, yn siarad â ffermwyr am y Cynllun Ffermio Cynaliadwy, ac mae'r adborth wedi bod yn gadarnhaol iawn, gyda llawer ohonynt yn paratoi ar gyfer dechrau'r Cynllun.
"Byddwn yn annog y rhai sydd eto i edrych ar y cynllun i wneud hynny cyn gynted â phosibl.
"Mae canlyniad pleidleisiau heddiw yn amddiffyn ein cymunedau, yn cefnogi ein ffermwyr, ac yn rhoi gobaith i genedlaethau'r presennol a'r dyfodol."