Mwynhewch lwybr syfrdanol arfordir Cymru gydag ymgyrch Trafnidiaeth Cymru 'O'r Cledrau i'r Llwybrau'

Mae Trafnidiaeth Cymru wedi bod yn cynnal ei ymgyrch 'O'r Cledrau i'r Llwybrau' ers 2022 – cafodd ei sefydlu yn wreiddiol i ddathlu dengmlwyddiant Llwybr Arfordir Cymru. Mae'r ymgyrch yn tynnu sylw at y ffordd y gellir cyrraedd gwahanol rannau o lwybr yr arfordir yn hawdd o wahanol orsafoedd trenau ar Rwydwaith Cymru a'r Gororau, o'r Fflint yn y Gogledd i Ddinbych-y-pysgod yn y Gorllewin.

Mae Llwybr Arfordir Cymru bellach yn enwog ledled y byd, ac mae'n cynnig cyfle unigryw i gerddwyr gerdded perimedr cyfan Cymru, gan fwynhau tirwedd unigryw a syfrdanol Cymru.

Yn ogystal â darparu gwybodaeth am y 1,000 milltir o lwybrau cerdded ledled Cymru, a'r gorsafoedd rheilffordd hygyrch gerllaw, mae gwefan 'O'r Cledrau i'r Llwybrau' yn eich galluogi i gynllunio eich taith ar y trên a'ch rhaglen gerdded i gyd-fynd â'ch anghenion unigol.

Dywedodd Ysgrifennydd y Cabinet dros Drafnidiaeth a Gogledd Cymru, Ken Skates:

"Nid yw pobl bob amser yn ymwybodol bod llawer o'n gorsafoedd rheilffordd yn gweithredu fel pyrth cyfleus i lwybrau cenedlaethol enwog a llwybrau cerdded yng Nghymru. Mae hon yn ymgyrch wych sy'n hyrwyddo ein rhwydwaith rheilffyrdd fel ffordd o gael mynediad i'n llwybr arfordirol anhygoel, felly beth am adael eich car gartref, nôl eich bŵts cerdded a'ch bag cefn, dal trên a mynd allan i archwilio."

Mae rhagor o wybodaeth ar gael yn y ddolen ganlynol: O'r Cledrau i'r Llwybrau | Trafnidiaeth Cymru