Pobl sy'n aros am lawdriniaeth sy’n sensitif o ran amser yn cael meddyginiaethau colli pwysau ar y GIG

Bydd pobl sy'n aros am lawdriniaeth neu drawsblaniad organ lle mae amser yn hollbwysig, menywod sydd am gael triniaeth ffrwythlondeb, a phobl sydd â chyflyrau fel asthma difrifol, apnoea cwsg ataliol difrifol, neu ganser lle byddai colli pwysau yn gwella canlyniadau eu triniaeth neu eu gallu i gael therapïau, yn gallu cael gafael ar y cyffur colli pwysau tirsepatid (Mounjaro).

Cyn hyn, dim ond drwy wasanaethau rheoli pwysau arbenigol roedd y feddyginiaeth colli pwysau ar gael drwy'r GIG.

Mae'r trefniadau newydd yn sicrhau bod pobl ag anghenion clinigol brys yn cael y cyfle i gael triniaeth yn gyflymach, tra bydd trefniadau ar gyfer mynediad ehangach yn cael eu datblygu.

Mae'r newid yn dilyn cymeradwyaeth NICE i tirsepatid ym mis Rhagfyr 2024 ar gyfer trin gordewdra mewn oedolion. Amcangyfrifir bod 186,000 o bobl yng Nghymru, o bosibl, yn bodloni'r meini prawf i fod yn gymwys.

Mae Llywodraeth Cymru yn datblygu model newydd cynhwysfawr i ehangu capasiti ar draws lleoliadau arbenigol, gofal sylfaenol a lleoliadau cymunedol. Bydd hyn yn golygu bod modd i tirsepatid a meddyginiaethau colli pwysau eraill fod ar gael yn ehangach, gan sicrhau bod pwyslais hefyd ar fynediad cyfartal, cymorth cynhwysfawr, atal ac ymyrraeth gynnar.

Dywedodd yr Ysgrifennydd Iechyd, Jeremy Miles: "Mae galw sylweddol am wasanaethau rheoli pwysau arbenigol a galw cynyddol am i'r feddyginiaethau hyn fod ar gael drwy'r Gwasanaeth Iechyd.

"Er mwyn helpu i ddiwallu'r galw mewn ffordd gynaliadwy, ry'n ni'n meithrin capasiti a gallu, gan sicrhau hefyd bod pobl â'r angen clinigol mwyaf brys yn gallu cael mynediad at driniaeth heb oedi.

"Mae'r dull gweithredu hwn yn cydnabod bod angen i hyn fod ar gael i rai pobl nawr."

Bydd Gweinidogion Cymru yn gwneud penderfyniadau pellach
ynglŷn â defnyddio meddyginiaethau colli pwysau wrth i'r llwybr clinigol newydd gael ei ddatblygu.