Senedd yn pasio deddfwriaeth sy'n trawsnewid yr ymateb i ddigartrefedd yng Nghymru

Bydd y Bil Digartrefedd a Dyrannu Tai Cymdeithasol (Cymru) yn newid ein system ddigartrefedd yn sylfaenol, felly mae'n canolbwyntio ar atal a darparu mwy o ddulliau o gefnogi pobl i gael cartrefi tymor hwy. 

Ymhlith prif elfennau'r Bil mae:

• Trawsnewid y system ddigartrefedd yng Nghymru fel ei bod yn canolbwyntio ar adnabod ac atal yn gynharach.   

• Targedu gweithredu at y rhai sydd mewn perygl fwyaf.

• Canolbwyntio ar ymateb aml-asiantaeth i ddigartrefedd, gan ddod â gwasanaethau cyhoeddus Cymru at ei gilydd i ymateb i achosion a chanlyniadau amrywiol digartrefedd.  

Yn dilyn y bleidlais lwyddiannus yn y Senedd, dywedodd Ysgrifennydd y Cabinet dros Lywodraeth Leol a Thai, Jayne Bryant:

"Mae'r Bil hwn yn unigryw.  Mae wedi'i wreiddio yn y profiad byw o ddigartrefedd ac mae pob rhan o'r Bil yn ymateb i brofiadau go iawn o'r system.

Mae heddiw yn drobwynt gwirioneddol i Gymru. Bydd y Bil yn trawsnewid ein system ddigartrefedd, gan symud i ffwrdd o un sy'n ymateb i argyfwng a thuag at un sy'n canolbwyntio'n gadarn ar atal, oherwydd mae pawb yn haeddu lle diogel i'w alw'n gartref.

"Mae'r Bil mentrus ac uchelgeisiol hwn – yn rhoi'r dulliau i ni greu system decach, atal digartrefedd, cefnogi pobl i gartrefi parhaol, a symud yn agosach at ein huchelgais hirdymor o roi terfyn ar ddigartrefedd yng Nghymru."

DIWEDD