Ystadegau newydd yn dangos bod lefelau ailgylchu yng Nghymru wedi codi unwaith eto

Mae ffigurau gwastraff trefol awdurdodau lleol a gafodd eu cyhoeddi heddiw, dydd Iau 29 Ionawr, yn dangos bod y gyfradd ailgylchu wedi cynyddu o 66.6% yn 2023–24 i 68.4% yn 2024–25 – mae hyn yn trawsnewidiad llwyr o'i gymharu â thua 5% cyn datganoli.

Yr ystadegau heddiw yw'r data blynyddol cyntaf i gael ei gyhoeddi ers i fesurau ailgylchu newydd yn y gweithle gael eu cyflwyno yng Nghymru, sy'n ei gwneud yn ofynnol i bob busnes, gweithle a chasglwr yn y sector cyhoeddus a'r trydydd sector gadw deunyddiau ailgylchadwy allweddol ar wahân.

Ers hynny, mae 8,187 tunnell ychwanegol o ddeunydd ailgylchadwy wedi cael eu casglu o weithleoedd gan awdurdodau lleol – cynnydd o 42% o'i gymharu â'r flwyddyn flaenorol. Mae gwastraff gweddilliol a gesglir o weithleoedd hefyd wedi gostwng 15.8%.

Mae hyn yn golygu bod miloedd o dunelli o ddeunyddiau ailgylchadwy gwerthfawr ychwanegol yn cael eu bwydo yn ôl i'r economi yn hytrach na chael eu llosgi neu eu hanfon at safleoedd tirlenwi.

Dim ond 0.7% o wastraff a gafodd ei anfon at safleoedd tirlenwi yn 2024 i 2025 – gostyngiad enfawr ar y 95% a anfonwyd cyn datganoli.

Dywedodd y Dirprwy Brif Weinidog sydd â chyfrifoldeb am Newid Hinsawdd, Huw Irranca-Davies:

"Rydyn ni'n parhau i adeiladu ar lefelau ailgylchu Cymru sydd eisoes o'r radd flaenaf. Mae hyn yn dangos y newid enfawr mewn agweddau dros y degawdau diwethaf – mae ailgylchu bellach yn rhan o hunaniaeth ein cenedl.

"Rydyn ni wedi cefnogi ein hymrwymiad â buddsoddiadau gwerth £1bn ers datganoli, sydd wedi arwain at gynnydd aruthrol mewn cyfraddau ailgylchu ers hynny.

"Rwy'n falch o bawb yng Nghymru sydd wedi chwarae eu rhan er mwyn cyrraedd lle rydyn ni heddiw – yn ein cartrefi a nawr yn ein gweithleoedd hefyd. Diolch am ymuno â'r gydymdrech hon."

Mae Cymru yn ail yn y byd o ran ailgylchu, o flaen y DU ac ychydig y tu ôl i Awstria yn y safleoedd byd-eang a gyhoeddwyd gan Eunomia Research and Consulting a Reloop yn 2024.

Mae dros hanner awdurdodau lleol Cymru wedi cyrraedd targed statudol 2024 i 2025 o 70% o'r gwastraff yn cael ei ailgylchu, a nododd dros 90% gynnydd yn eu cyfradd ailgylchu o'i chymharu â'r flwyddyn flaenorol.

Ychwanegodd y Dirprwy Brif Weinidog:

"Mae ein hanes ailgylchu yn rhywbeth i ymfalchïo ynddo wrth inni barhau i gymryd camau i fynd i'r afael â'r argyfwng hinsawdd a'r argyfwng natur a thyfu'r economi werdd.

"Ond does dim lle i laesu dwylo.

"Mae bod yn rhif un yn y byd ar gyfer ailgylchu o fewn ein gafael ni os ydyn ni'n cadw'r momentwm."