Bydd technoleg lled-ddargludo cyfansawdd yn greiddiol i’r chwyldro diwydiannol nesaf yn ôl Vaughan Gething, Gweinidog yr Economi

Bu’r Gweinidog yn ymweld ag SPTS Technologies, yng Nghasnewydd, sy’n dylunio ac yn cynhyrchu’r cyfarpar prosesu haenellau, a ddefnyddir gan fusnesau sydd ar flaen y gad yn y sector lled ddargludo byd-eang.

Mae lled-ddargludyddion cyfansawdd yn gydrannau hanfodol ar gyfer dyfeisiau fel yr Apple iPhone a thechnoleg fel Wi-Fi.

Mae SPTS Technologies yn un o bedwar cwmni angori, ynghyd â IQE, Newport Wafer Fab a Microchip, sy’n rhan o glwstwr lled-ddargludo cyfansawdd yn y De.

Mae Llywodraeth Cymru wedi rhoi’r buddsoddiad cychwynnol i ddatblygu’r clwstwr hwn yn 2015. Dyma’r catalydd a wnaeth Cymru yn ganolfan mwyaf blaenllaw yn y byd mewn arbenigedd ym maes lled-ddargludo cyfansawdd.

Mae busnes technoleg Rockley Photonics, gyda’i dechnoleg clinig ar yr arddwrn wedi cychwyn o hyn, ac wedi dewis defnyddio’r cyfleusterau penigamp sydd gan Newport Wafer Fab ac IQE.

Mae aelodau o’r clwstwr yn cynhyrchu refeniw o dros £600 miliwn y flwyddyn rhyngddynt, ac mae’r sector lled-ddargludo cyfansawdd a’r gadwyn gyflenwi yn gyffredinol, yn cyflogi dros 2,000 o bobl yng Nghymru.

Mae gan SPTS Technologies, enillydd gwobr uchel ei pharch, sef Gwobr y Frenhines am Fenter mewn Arloesi yn 2020, gynlluniau i ehangu ei fusnes yng Nghymru. Ar hyn o bryd, mae’n cyflogi 447 o bobl yn y Bencadlys yng Nghymru.

Dywedodd Gweinidog yr Economi, Vaughan Gething:

“Rydym yn hynod falch ein bod wedi helpu i feithrin yr ecosystem lled-ddargludo cyfansawdd fwyaf blaengar yn y byd yng Nghymru. Mae’n rhwydwaith potensial uchel, sy’n troi ymchwil blaengar a gallu arloesol yn gynhyrchion Cymreig o safon byd-eang ar gyfer y marchnadoedd technoleg newydd, a’r rhai sy’n dod i’r amlwg.

Mae’r dechnoleg hon – technoleg y genhedlaeth nesaf – yn siapio ein bywyd heddiw a bydd yn gwella ein profiadau yn y dyfodol – o gerbydau trydan, i dechnoleg adnabod wynebau ar ffonau clyfar a chymwysiadau gofod.

“Mae’r sector hwn o bwys mawr i Gymru, yn rhoi cyflogaeth o werth uchel ac yn atyniad go iawn i fuddsoddiad tramor uniongyrchol. Mae hefyd yn tynnu sylw at ddatblygiadau mewn llawer o ddiwydiannau eraill, ac rydym yn credu y gall gyflawni fel rhan o’n Rhaglen Lywodraethu, drwy ysgogi economi gryfach a gwyrddach, gan gyfannu at yr her datgarboneiddio sero-net.

“Rydym wedi buddsoddi mewn seilwaith er mwyn cysylltu darganfyddiadau academaidd a chymhwyso masnachol, wedi cefnogi cwmnïau i ddatblygu cynhyrchion arloesol ar gyfer marchnadoedd newydd ac wedi annog cydweithio trwy ein rhaglen Arloesi Agored.

“Mae SPTS, sydd yn weithredol ers 40 o flynyddoedd, yn dystiolaeth wych yn y maes cyffrous hwn ac rwy’n falch eu bod yn ehangu’r busnes yng Nghymru yn sylweddol. Rwy’n dymuno’r gorau iddynt yn y dyfodol wrth iddynt fod yn genhadon gwych i lwyddiant technegol y sector yng Nghymru.”

Dywedodd Oreste Donzella, Is Lywydd Gweithredol Corfforaeth KLA:

“Cyfrinach llwyddiant SPTS, sy’n gwmni KLA, yw ei ymrwymiad diflino i arloesi a chyflawni rhagoriaeth i’n cwsmeriaid.

“Rydym yn ysgogi datblygiadau yn barhaus ac yn ateb yr heriau sy’n wynebu’r sector lled-ddargludo cyfansawdd. Mae twf a llwyddiant SPTS nid yn unig yn rhoi cydnabyddiaeth fyd-eang i'n busnes, ond hefyd mae’n rhoi Cymru ar y map lled-ddargludo byd-eang. Bydd ein gweithlu ymroddgar yma yng Nghymru, ein llwyddiant parhaus a'n hymrwymiad i dwf ac ehangu yn sicrhau bod Cymru ac SPTS ar flaen y gad yn y chwyldro technolegol hwn.”