Y Gronfa Balchder Llawr Gwlad ar agor ar gyfer ceisiadau

O 15 Mehefin, gall trefnwyr digwyddiadau Balchder ledled Cymru wneud cais i'r Gronfa
Balchder Llawr Gwlad i helpu i dalu costau digwyddiadau Balchder lleol ledled Cymru a gynhelir yn 2026/27.

Mae digwyddiadau Balchder sy'n cael eu cefnogi gan y gronfa wedi tyfu'n sylweddol yn ystod y blynyddoedd diwethaf - o 6 digwyddiad yn 2022/23 i 21 y llynedd. Mae £69,250 ar gael gan y gronfa eleni, sy'n uwch na'r £17,700 yn 2022/23.

Mae nifer o ddigwyddiadau Balchder lleol yn cael eu cynnal ledled Cymru y mis hwn. Defnyddiodd Gyda'n Gilydd ar gyfer Bae Colwyn gyllid o'r Gronfa Balchder Llawr Gwlad i gyflwyno penwythnos llawn dathliadau, cerddoriaeth fyw, adloniant, gweithgareddau i deuluoedd, stondinau cymunedol a gwerthwyr bwyd, a hynny oll am ddim.

Dywedodd Kai Davies, Rheolwr Digwyddiadau a Chyfarwyddwr Gyda'n Gilydd ar gyfer Bae Colwyn:

"Cafodd Cronfa Balchder Llawr Gwlad effaith sylweddol ar gyflawni digwyddiad Balchder Bae Colwyn yn 2025 - fe helpodd ni i gyflwyno digwyddiad diogel, cynhwysol a chroesawgar a ddaeth â dros 8,000 o bobl at ei gilydd i ddathlu'r gymuned LHDTC+ ym Mae Colwyn a Gogledd Cymru. I lawer o bobl a ddaeth yno, yn enwedig pobl ifanc, gall gweld y dathliadau a'r gefnogaeth i'r gymuned LHDTC+ yn eu tref nhw gael effaith gadarnhaol barhaol."

Dywedodd y  Dirprwy Brif Weinidog a Gweinidog Cabinet dros Gyfiawnder Cymdeithasol a Chydraddoldeb, Sioned Williams:

"Wrth i hawliau LHDTC+ wynebu bygythiadau cynyddol, mae'r Llywodraeth newydd ym Mae Caerdydd yn benderfynol o wneud popeth o fewn ein gallu i amddiffyn a chryfhau'r hawliau hynny yma yng Nghymru.

Mae Mis Balchder yn gyfle i ddathlu cynhwysoldeb a chryfder ein cymunedau, ac i roi cydnabyddiaeth i'r gwirfoddolwyr y mae eu hymroddiad nhw yn gwneud hyn yn bosibl. Mae gwirfoddolwyr yn dod â phobl at ei gilydd, yn creu mannau o groeso a pherthyn, ac yn sicrhau bod pobl LHDTC+ yn gallu dathlu'n ddiogel ac yn agored yn eu cymunedau eu hunain.

"Rwyf eisoes wedi mynychu digwyddiadau Balchder yn Abertawe a Phontardawe y mis yma, ac rwy'n edrych ymlaen at gael mynd i ddigwyddiad Balchder Cymru yng Nghaerdydd y penwythnos hwn a chwrdd â rhai o'r sefydliadau anhygoel sy'n cefnogi ein cymunedau LHDTC+. Mae parch, undod a thegwch yn werthoedd sydd bob amser wedi bod yn bwysig i bobl yng Nghymru, ac mae'r Llywodraeth hon yn gadarn yn ein hymrwymiad i gynhwysiant. Rwy'n falch iawn ein bod wedi ymrwymo yn ein  maniffesto i ddarparu cefnogaeth barhaus i sefydliadau Balchder."

Mae'r gronfa yn cael ei gweinyddu mewn partneriaeth â Balchder Cymru.

Dywedodd Dan Walsh, Cadeirydd Pride Cymru:

"Mae Pride Cymru yn falch iawn o gefnogi'r gwaith o gyflawni'r Gronfa Balchder Llawr Gwlad. Mae digwyddiadau Balchder lleol yn rhan hanfodol o greu mannau diogel, gweladwy a chynhwysol i bobl LHDTC+ ledled Cymru. Mae'r gronfa hon yn cynrychioli buddsoddiad pwysig mewn mudiadau Balchder ar lawr gwlad, gan helpu sefydliadau a arweinir gan y gymuned i ddatblygu, tyfu a chyflwyno digwyddiadau a gweithgareddau ystyrlon sy'n adlewyrchu anghenion eu cymunedau LHDTC+ lleol."

Y dyddiad cau ar gyfer ceisiadau yw 17 Awst.

Mae rhagor o wybodaeth am sut i wneud cais ar gael yma Cronfa Balchder Llawr Gwlad| LLYW.CYMRU