Y Gweinidog yn talu teyrnged i’r Prif Swyddog Milfeddygol

Yr Athro Glossop yw Prif Swyddog Milfeddygol cyntaf Cymru yn dilyn datganoli pwerau iechyd a lles anifeiliaid yn 2005.  Cafodd ei phenodi ar ôl treulio amser yng Ngwasanaeth Milfeddygol y Wladwriaeth, sydd bellach yn cael ei hadnabod fel APHA, yn delio ag achosion o Glwy'r Traed a'r Genau yn 2001 ac yna TB mewn gwartheg.

Dywedodd y Gweinidog Materion Gwledig, Lesley Griffiths: "Mae cyfraniad Christianne i iechyd a lles anifeiliaid yng Nghymru yn aruthrol.  Yn ystod ei chyfnod yn y swydd, mae wedi ymdrin â nifer o achosion anodd o glefydau anifeiliaid fel ffliw adar, yr effaith ar Gymru yn sgil achosion o glwy'r traed a'r genau yn Lloegr yn 2007, yn ogystal â gweithio'n ddiflino gyda'i thîm ar y rhaglen Dileu TB.

"Yng Nghymru mae gennym bellach Fframwaith Iechyd a Lles Anifeiliaid a Rhaglen allweddol ar gyfer ymrwymiadau'r Llywodraeth ar les anifeiliaid a nodir yn ein cynllun pum mlynedd.  Bydd y Cynllun Ffermio Cynaliadwy newydd yn cynnwys modiwlau'n canolbwyntio ar gynllunio iechyd anifeiliaid a bioddiogelwch, a fydd yn cyd-fynd â'r uchelgeisiau a nodir yn y Fframwaith. Hefyd, mae gennym bellach ysgol milfeddygaeth ym Mhrifysgol Aberystwyth, y cyntaf yng Nghymru, ac mae Christianne yn ymwneud yn agos â hi.

"Mae cymaint i Christianne fod yn falch ohono yn ystod ei chyfnod fel y Prif Swyddog Milfeddygol. Byddaf yn gweld eisiau ei gwybodaeth, ei chyngor a'i chefnogaeth ac yn dymuno'r gorau iddi ar gyfer y dyfodol."

Dywedodd y Prif Swyddog Milfeddygol, Christianne Glossop: "Mae hi wedi bod yn fraint fawr cael bod yn Brif Swyddog Milfeddygol cyntaf Cymru – mae wedi bod yn swydd fy mreuddwydion.

"Wrth ddatganoli pwerau iechyd a lles anifeiliaid, roedd yn gyfle unwaith mewn cenhedlaeth i gynllunio'r dull gweithredu yma yng Nghymru, a byddaf bob amser yn ddiolchgar fy mod wedi bod yn rhan o hynny.

"Rydym wedi wynebu sawl her, gan gynnwys yr achosion o glwy'r traed a'r genau yn 2007 yn Lloegr, ac yna'r achos cyntaf o'r Tafod Glas yn dod i Brydain, a bygythiad parhaus ffliw adar, ond rwyf wedi bod yn ffodus iawn i gael tîm ardderchog o filfeddygon a swyddogion yn gweithio ochr yn ochr â mi ar hyd yr amser.

"Pan ddechreuais i yn y swydd doedd dim hyb ar gyfer addysg ac ymchwil milfeddygol yng Nghymru a nawr mae gennym ysgol milfeddygaeth yn Aberystwyth, a llawer mwy yn ogystal â hynny, sy'n dangos pa mor bell rydyn ni wedi dod yn yr amser yna.

"Rydw i mor ddiolchgar am y cyfleoedd sydd wedi dod i'm rhan fel Prif Swyddog Milfeddygol Cymru, ac rwy'n edrych ymlaen at bennod nesaf fy ngyrfa fel milfeddyg."