Cymorth ar gael i ffermwyr wrth i'r tywydd sych barhau

Gall ffermwyr a thyfwyr sy'n wynebu cyfnod arall o dywydd sych gael mynediad at gymorth ymarferol sydd ar gael i'w helpu i ymdopi. 

Mae amaethyddiaeth yn agored iawn i niwed mewn tonnau gwres ac amodau sych, sy'n gallu lleihau cynnyrch cnydau, niweidio glaswelltiroedd, bygwth lles da byw a rhoi pwysau cynyddol ar adnoddau dŵr.  

Er bod amodau heddiw yn anodd, mae ymchwil yn dangos y bydd cenedlaethau'r dyfodol yn ffermio mewn amodau llawer mwy heriol oherwydd newid hinsawdd, sy'n golygu fod addasu'n gynnar yn hanfodol. 

Mae'r grant Cyfalaf Cynhyrchu ac Effeithlonrwydd bellach ar agor, a gall ffermwyr wneud cais am gyllid tuag at fesurau addasu i'r hinsawdd fel tyllau turio, offer cynaeafu dŵr, a systemau awyru gan gynnwys ffaniau ar gyfer siediau gwartheg. 

Anogir ffermwyr sydd wedi ymuno â'r Cynllun Ffermio Cynaliadwy (SFS) neu sy'n cyflawni contractau cynlluniau paratoi, a allai fod yn cael trafferth bodloni'r gofynion oherwydd y tywydd, i wneud cais am randdirymiad dros dro trwy eu cyfrif ar-lein RPW, gan gynnwys tystiolaeth ffotograffig sy'n dangos cyflwr y cnwd. O ystyried yr amodau eithriadol eleni, bydd ceisiadau yn cael eu hystyried yn ffafriol a bydd atebion yn cael eu rhoi yn ddi-oed. 

Dywedodd Llyr Gruffydd, y Gweinidog Cabinet dros Wydnwch Gwledig a Chynaliadwyedd: 

"Rydym yn cydnabod y pwysau sy'n wynebu ffermwyr a thyfwyr yn ystod cyfnodau hir o dywydd sych, gan gynnwys effeithiau ar dda byw, cnydau, a busnesau fferm. 

"Dyna pam rydyn ni eisiau i ffermwyr wybod am y cymorth sydd ar gael, boed hynny drwy ein cynllun Grantiau Cyfalaf, neu'r hyblygrwydd sydd ar gael o dan y Cynllun Ffermio Cynaliadwy. 

 "Rydym wedi cyhoeddi mwy na £1bn yn ystod tymor y Senedd hon i gefnogi amaethyddiaeth gynaliadwy, a thrwy ein Rhaglen Diwygio Dŵr, byddwn yn cymryd rheolaeth lawn o ddŵr yng Nghymru, nawr ac ar gyfer cenedlaethau'r dyfodol." 

Dylai ffermwyr sydd â phryderon am les eu hanifeiliaid ofyn am gyngor ar unwaith gan eu milfeddyg. Mae canllawiau ymarferol ar ofalu am anifeiliaid fferm a cheffylau mewn tywydd eithafol ar gael ar wefan Llywodraeth Cymru.