Cymru ac Iwerddon yn cydweithio ar wydnwch Môr Iwerddon

Dyna oedd neges Ysgrifennydd y Cabinet dros Drafnidiaeth a Gogledd Cymru, Ken Skates, cyn ymweld ag Iwerddon heddiw (7 Mawrth).

 Yn ystod ei ymweliad â Dulyn bydd Ysgrifennydd y Cabinet yn cwrdd â’r Gweinidog Gwladol dros Ffyrdd a Thrafnidiaeth Rhyngwladol, Logisteg, Rheilffyrdd a Phorthladdoedd Sean Canney.   Byddant yn trafod cylch gwaith y tasglu i sicrhau bod porthladdoedd Cymru'n diwallu anghenion y ddwy wlad yn y dyfodol, gan adeiladu ar y profiad o gynnal cysylltiadau rhwng Cymru ac Iwerddon yn ystod y tarfu a fu ar wasanaethau ym Mhorthladd Caergybi. 

 Bydd Ysgrifennydd y Cabinet hefyd yn cwrdd â Chymdeithas Allforwyr Iwerddon a Chymdeithas Cludo Llwythi Iwerddon.

Wrth siarad cyn y digwyddiad, dywedodd: “Mae Cymru bob amser wedi mwynhau cysylltiadau agos ag Iwerddon, rhywbeth yr ydym yn ei werthfawrogi'n fawr.  Fe wnaeth y berthynas hon ein gwasanaethu'n dda yn ystod yr wythnosau anodd pan gaewyd porthladd Caergybi dros dro.  Drwy gydweithio â'n holl bartneriaid roeddem yn gallu sicrhau y gallai teithwyr a llwythi symud drwy lwybrau amgen ar yr adeg dyngedfennol honno o'r flwyddyn.

 “Rwy'n llwyr werthfawrogi a deall yr effaith a'r pryder y cafodd y cau hwn, yn enwedig adeg y Nadolig.  Dyna pam mae'n rhaid i ni i gyd weithio gyda'n gilydd ar wydnwch y cysylltiadau rhwng ein gwledydd.  Rwyf am sicrhau bod y tasglu yn casglu'r holl dystiolaeth a safbwyntiau perthnasol o Gymru ac Iwerddon.  Bydd y cylch gorchwyl drafft yn ganolbwynt ar gyfer fy nhrafodaethau gyda'r Gweinidog Canney yn Nulyn.”