Cymru yn dangos ei hagwedd unedig at groesawu pobl sy'n cyrraedd o Affganistan fel Cenedl Noddfa.

Mae dull 'Tîm Cymru' wedi sicrhau bod gwaith amlasiantaethol cydweithredol wedi'i gyflawni'n gyflym i sicrhau y gall Cymru ymgorffori ein gweledigaeth Cenedl Noddfa go iawn. Mae hyn wedi cynnwys Llywodraeth Cymru, Awdurdodau Lleol Cymru, Urdd Gobaith Cymru, y Weinyddiaeth Amddiffyn, sefydliadau cefnogi ffoaduriaid ac Affganiaid Cymreig lleol eu hunain. 

Dyma'r enghraifft ddiweddaraf yn hanes hir Cymru o ddarparu noddfa i'r rhai sy'n ceisio noddfa. Mae awdurdodau lleol Cymru hefyd yn parhau i gefnogi Cynllun Ailsefydlu Pobl Sy'n Agored i Niwed a'r system lloches. Bydd y dull cenedlaethol cydweithredol hwn yn parhau yn ystod yr wythnosau nesaf i sicrhau y gellir dod â rhagor o deuluoedd yn ddiogel i Gymru a’u hintegreiddio'n effeithiol yn ein cymunedau. 

Dywedodd Jane Hutt, y Gweinidog dros Gyfiawnder Cymdeithasol: 

"Heddiw, rydym yn croesawu'r teuluoedd a'r unigolion sydd wedi gwasanaethu ein gwlad yn Affganistan. Rydym wedi nodi’n glir ein haddewid bod Cymru'n Genedl Noddfa ac rydym wedi ymrwymo i wneud popeth sy'n bosibl i sicrhau bod dehonglwyr, ffoaduriaid a theuluoedd o Affganistan yn cael eu croesawu. 

  Mae Cymru'n Genedl Noddfa – byddwn yn gwneud popeth o fewn ein gallu i roi croeso cynnes yn y tymor byr a bydd ein cymunedau, heb os, yn cael eu cyfoethogi gan eu sgiliau a'u profiadau yn y dyfodol agos iawn. 

  Mae pob awdurdod lleol yng Nghymru yn cymryd rhan yn y cynlluniau hyn ac wedi cynnig eu cefnogaeth a'u cymorth i ddinasyddion Affganistan sy'n cael eu hailgartrefu yn y DU. Hoffwn ddiolch i'n holl bartneriaid yn y dull cydweithredol hwn o weithredu Cenedl Noddfa i gydgysylltu'r addewid sylweddol hwn. Rwyf hefyd am gofnodi fy niolch arbennig i Urdd Gobaith Cymru am gael y weledigaeth ddyngarol i sicrhau y gallwn ddarparu croeso arbennig Cymreig i'n ffrindiau newydd o Affganistan.” 

Dywedodd Sian Lewis, Prif Weithredwr yr Urdd: 

“Mae hyn wedi bod yn ymdrech tîm enfawr i Gymru ar draws pob sector, ac rydym yn ddiolchgar i'n partneriaid am ein galluogi i agor ein drysau fel noddfa i deuluoedd sy'n chwilio am loches a diogelwch. 

 Fel sefydliad, rydym yn falch o helpu ac rydym yn parhau i rannu â'n haelodau bwysigrwydd teyrngarwch i wlad a diwylliant ond hefyd i ddynoliaeth a lles uwch. 

 Mae gennym rwymedigaeth foesol fel sefydliad ieuenctid cenedlaethol i gefnogi prosiectau dyngarol a chynnig llaw o gyfeillgarwch a chefnogaeth i gymuned Affganistan yn eu cyfnod o angen.” 

Meddai’r Cyrnol Sion Walker, Dirprwy Comander Brigâd 160 (Cymru): 

“Mae Brigâd 160 (Cymru) a'i Chyd-bwyllgor Milwrol (Cymru) wedi'i strwythuro i gefnogi Llywodraeth Cymru a phob awdurdod lleol wrth ddelio â sefyllfaoedd mawr fel yr ydym wedi'i wneud drwy gydol pandemig COVID. 

  Drwy gefnogi'r holl asiantaethau hynny sy'n ymwneud â datblygu cynllun Cymru, mae wedi eu galluogi i ganolbwyntio ar eu meysydd cyfrifoldeb allweddol ac wedi galluogi dwyn cynllun Cymru ynghyd mewn ychydig dros wythnos. 

  Mae cysylltiadau hanesyddol uniongyrchol â Chymru ac unedau sy'n wynebu Cymru ac aelodau o lawer o'r teuluoedd hynny sy'n dod i Gymru. Byddant wedi gweithio ochr yn ochr â'i gilydd yn ystod cyfnodau anodd iawn yn Affganistan; mae ein hymwneud yn gydnabyddiaeth o'r gefnogaeth a roddwyd a'r cyfeillgarwch a ddatblygwyd yn ystod yr amseroedd hynny ac rydym yn falch o fod wedi chwarae rhan yn y gwaith o wneud Cymru'n genedl noddfa.”  

Dywedodd Huw Thomas, Arweinydd Cyngor Caerdydd: 

"Mae'r teuluoedd hyn wedi cael eu gorfodi i adael eu cartrefi er mwyn achub eu bywydau, wrth ffoi rhag y Taliban. Mae'n anodd i'r rhan fwyaf ohonom ddychmygu'r hyn y maent wedi bod drwyddo. Mae Cyngor Caerdydd wedi bod yn gweithio y tu ôl i'r llenni drwy'r amser i sicrhau ein bod yn barod i chwarae ein rhan, ochr yn ochr â'n holl bartneriaid, i leddfu'r argyfwng ofnadwy hwn. 

  Mae gan Gaerdydd hanes hir a balch o groesawu pobl o bob hil a chred i'n dinas a byddwn yn gwneud popeth o fewn ein gallu i sicrhau bod pob un o'r teuluoedd hyn yn teimlo'r croeso hwnnw o'r diwrnod cyntaf iddynt gyrraedd. 

 Rydym yn eu croesawu i gyd, gan wybod y byddant yn dod yn aelodau pwysig a gwerthfawr o'n cymuned fywiog, amlddiwylliannol cyn bo hir.”