Cynllun ffyrdd newydd i wella amseroedd teithio a gwella cysylltedd yn Ne-orllewin Cymru

Bydd y cynllun, a agorwyd yn swyddogol heddiw gan y Prif Weinidog, Eluned Morgan, yn gwella cysylltedd, yn lleihau amseroedd teithio, yn darparu gwytnwch a dibynadwyedd ychwanegol, ac yn gwella diogelwch ar y ffyrdd. Mae'n darparu uwchraddiad 6km newydd i'r hen ffordd, cerbytffordd newydd, cylchfannau newydd, 2 bont newydd, 22 cwlfert, llwybr teithio llesol newydd a thirlunio amgylcheddol gyda dros 450,000 o blanhigion a choed.

Yn ogystal â darparu gwell hygyrchedd ar hyd coridor trafnidiaeth y dwyrain-orllewin yn ne Cymru i gyrchfannau gwaith, cymunedol a thwristiaeth allweddol, mae'r cynllun hefyd wedi creu cyfleoedd sylweddol i economi’r wlad ac yn lleol, gan gynnwys:

• Cyflogi 97% o weithwyr o bob cwr o Gymru.
• Gweithio gyda mwy na 100 o fusnesau yng Nghymru fel rhan o'r gadwyn gyflenwi
• Cyflogi mwy na 50 o bobl ddi-waith ac 16 o brentisiaid o'r ardal,

Mae cyfres o fanteision amgylcheddol hefyd wedi'u sicrhau gan y cynllun megis,

• Diogelu rhywogaethau gwarchodedig fel moch daear, ystlumod a phathewod drwy trwy ffensys mamaliaid, tanffyrdd, a chysylltedd rhwng cynefinoedd.
• Plannu 150,000 o goed newydd a 300,000 o blanhigion newydd

Dywedodd Eluned Morgan, Prif Weinidog Cymru:

"Mae trwsio ein ffyrdd yn flaenoriaeth allweddol i ni. Rydym wedi gwario £1 biliwn yn trwsio a gwella ein ffyrdd ers 2021, gan gynnwys mwy na £250 miliwn yn ystod y flwyddyn ddiwethaf.

"Mae cwblhau cynllun gwella'r A40 rhwng Llanddewi Felffre a Redstone Cross yn newyddion ardderchog i Dde-orllewin Cymru sy'n darparu cyswllt trafnidiaeth hygyrch mwy gwydn i dwristiaeth a phorthladdoedd strategol allweddol yn Sir Benfro. 

"Mae'r cynllun hefyd yn helpu i gysylltu cymunedau lleol â chanolfannau trafnidiaeth allweddol, yn ogystal â hyrwyddo ffyrdd iach o fyw gyda chyflwyno llwybr newydd i bobl sy'n dymuno beicio, cerdded neu farchogaeth." 

Dywedodd Ysgrifennydd y Cabinet dros Drafnidiaeth a Gogledd Cymru, Ken Skates:

"Mae'r prosiect hwn yn ddarn trawiadol o beirianneg ac yn enghraifft wych o sut y gall buddsoddiad wedi'i dargedu mewn seilwaith ffyrdd gyflawni ar sawl lefel, gan ddarparu swyddi i'r gymuned leol, gwella hygyrchedd, cefnogi addysg a sgiliau, ochr yn ochr â darparu buddion amgylcheddol.

"Mae wedi bod yn brosiect cymhleth sydd wedi cynnwys nifer o bartneriaid allweddol a hoffwn ddiolch i bawb sydd wedi chwarae eu rhan yn ein helpu i gyflawni hyn."