Dweud eich dweud ar wella trafnidiaeth yn eich ardal

Bydd Cynlluniau Trafnidiaeth Rhanbarthol yn canolbwyntio ar gyflwyno dull mwy strategol o wella trafnidiaeth ym mhob rhanbarth o Gymru er mwyn ei gwneud yn fwy hygyrch, cynaliadwy ac effeithlon i gymunedau.

Bydd y dull newydd hwn yn grymuso arweinwyr lleol i gymryd mwy o reolaeth dros fuddsoddiadau mewn trafnidiaeth yn yr ardal. I ategu'r gwaith yma, bydd nifer o grantiau trafnidiaeth gan Lywodraeth Cymru yn cael eu datganoli o flwyddyn ariannol 2026/27 ymlaen fel y gall rhanbarthau unigol bennu eu blaenoriaethau eu hunain.

Mae timau yn y Gogledd, y Canolbarth, De-ddwyrain a De-orllewin Cymru wedi bod yn datblygu eu cynlluniau trafnidiaeth rhanbarthol ac maent bellach yn ymgynghori â phobl leol i gael eu barn ar bolisïau a phrosiectau arfaethedig neu'n bwriadu gwneud hynny'n fuan.

Bydd cynlluniau terfynol o ran yr hyn a fydd yn cael ei gyflawni ym mhob rhanbarth dros y pum mlynedd nesaf yn cael eu cyhoeddi yn ddiweddarach yr haf hwn.

Dywedodd Ysgrifennydd y Cabinet dros Drafnidiaeth a Gogledd Cymru, Ken Skates:

"Grymuso cynghorau lleol ar y lefel fwyaf priodol i gyflawni'r cynlluniau trafnidiaeth ar gyfer eu rhanbarth yw'r peth iawn i'w wneud.

"Gyda'u gwybodaeth a'u dealltwriaeth leol, nhw sydd yn y sefyllfa orau i ddeall anghenion lleol a sicrhau bod y buddsoddiadau a wneir yn rhoi pobl a chymunedau yn gyntaf."