Ffermwyr o Gymru i dderbyn dros £1 biliwn mewn sicrwydd cyllid amlflwydd

Bydd ffermwyr Cymru yn derbyn dros £1 biliwn o gyllid ar draws y tymor hwn yn y Senedd i gefnogi amaethyddiaeth gynaliadwy, gan roi'r sicrwydd hirdymor sydd ei angen ar y sector i gynllunio a buddsoddi yn hyderus. 

Gwnaeth Gweinidog y Cabinet dros Wydnwch a Chynaliadwyedd Gwledig, Llyr Gruffydd, y cyhoeddiad yn Sioe Frenhinol Cymru — ei gyhoeddiad cyntaf fel Gweinidog Gwydnwch a Chynaliadwyedd Gwledig. Mae'r ymrwymiad yn darparu £340 miliwn y flwyddyn am dair blynedd hyd at fis Mawrth 2030 ar gyfer y Cynllun Ffermio Cynaliadwy, gan gynnwys £238 miliwn gwarantedig y flwyddyn ar gyfer yr haen Gyffredinol a £102 miliwn ar gyfer darparu'r Haenau Dewisol a Chydweithredol. 

Mae'r symudiad yn dod â'r model cyllido o flwyddyn i flwyddyn i ben sydd wedi gwneud cynllunio hirdymor yn anodd i fusnesau ffermio. Mae'n cyflawni addewid a wnaed yn ystod 100 diwrnod cyntaf Llywodraeth Plaid Cymru i ddarparu cyllideb amlflwydd ar gyfer y Cynllun Ffermio Cynaliadwy. 

Dywedodd y Gweinidog: "Nid yw rhoi dim ond 12 mis o gynllun i ffermwyr o ran cyllid yn ddigonol. Rydym yn gwybod pa mor anodd yw cynllunio a gwneud penderfyniadau busnes heb wybod pa gyllid sy'n dod. Dywedodd ffermwyr wrthym yn bendant ac yn glir bod angen sicrwydd a sefydlogrwydd arnyn nhw - a dyna'n union beth rydyn ni'n ei roi." 

Yn dilyn adborth cynnar o'r adolygiad annibynnol i'r baich biwrocrataidd ar ffermydd teuluol, dan arweiniad John Davies, cyhoeddodd y Gweinidog hefyd gamau cynnar i dorri biwrocratiaeth i ffermwyr.   

Mae Llywodraeth Cymru wedi cyhoeddi symleiddio'r dull ar gyfer y Cylch Gwella Iechyd Anifeiliaid (AHIC) yn Haen Gyffredinol y Cynllun Ffermio Cynaliadwy.   

Bydd y symleiddio yn digwydd mewn dwy ran: Bydd Llywodraeth Cymru yn gweithio gydag unrhyw gynllun sicrwydd fferm sydd â diddordeb i sicrhau bod gofynion yn cael eu halinio, sy'n golygu mai dim ond un ffurflen o 2027 ymlaen fydd angen i ffermwyr yn y cynlluniau hynny lenwi — gan gyflawni dau ganlyniad o un ymweliad â milfeddyg: sicrwydd i'r fferm a chydymffurfio â'r SFS.  

Wrth wraidd ein dull mae'r berthynas waith agos rhwng ffermwyr a'u milfeddygon i gyflawni canlyniadau cadarnhaol.

Cyhoeddodd y Gweinidog hefyd y bydd yn cyflwyno rhai Camau Gweithredu Dewisol ac y bydd ffenestr newydd y Cynllun Adnoddau Naturiol Integredig yn agor yn ddiweddarach yn y flwyddyn, elfen allweddol sy'n bwydo i'r Haen Gydweithredol. 

Ychwanegodd y Gweinidog: "Mae'r fferm deuluol yng nghanol Cymru wledig - ei heconomi a'i chymunedau. Rwy'n ymrwymedig i weithio i sicrhau bod ffermio yng Nghymru yn ffynnu am genedlaethau i ddod. 

"Fy neges i ffermwyr o'r diwrnod cyntaf yw – mae gennych Weinidog ar eich ochr chi. Rhywun sy'n deall y diwydiant amaethyddol, sy'n gwybod mai'r fferm deuluol yw sylfaen ein heconomi wledig a'n cymunedau gwledig, ac a fydd yn gweithio bob dydd i sicrhau bod ffermio yng Nghymru yn ffynnu am genedlaethau i ddod."