Gwaith Cam 2 i ddechrau ar Bont Menai

Bydd gwaith cam dau yn cynnwys paentio o dan y dec, uwchraddio goleuadau a rhai atgyweiriadau strwythurol terfynol i baratoi ar gyfer 200 mlwyddiant y bont yn 2026.

Yn ystod y cyfnod hwn, bydd y bont yn parhau ar agor gyda mesurau rheoli traffig ar waith i sicrhau cyn lleied â phosibl o darfu ar drigolion lleol. Bydd y cyfyngiad pwysau 7.5 tunnell hefyd yn cael ei ailgyflwyno yn ystod y cyfnod hwn i ‘ryddhau’ capasiti ar y bont fel y gellir gosod llwyfannau gwaith dros dro a chyfarpar angenrheidiol i gyflawni'r gwaith.

Cynghorir modurwyr i gadw at y cyfyngiad pwysau a chynllunio ymlaen llaw.

Dywedodd Ysgrifennydd y Cabinet dros Drafnidiaeth a Gogledd Cymru, Ken Skates:

“Mae pob ymdrech yn cael ei wneud i sicrhau cyn lleied â phosibl o darfu pellach ar gymunedau ar ddwy ochr y bont. Yn dilyn adborth, gwnaethom oedi cam dau i leihau'r effaith ar fusnesau dros gyfnod y Nadolig a chynyddu gwydnwch yn ystod cyfnodau o dywydd garw. Roedd hyn yn fuddiol yn ystod stormydd diweddar pan gafodd Pont Britannia ei chau yn llawn.

“Byddem hefyd yn disgwyl tywydd gwell ar gyfer cam dau i barhau o fis Mawrth ymlaen.

“Hoffwn ddiolch unwaith eto i'r rhai yr effeithir arnynt am eu hamynedd wrth inni wneud y paratoadau terfynol i adfer y bont i'w chyflwr gorau mewn pryd ar gyfer ei 200 mlwyddiant ym mis Ionawr 2026.

Mae rhagor o wybodaeth ar gael yma: A5 Pont Menai: cwestiynau cyffredin | LLYW.CYMRU