Taith twf hynod lwyddiannus i gwmni creadigol

Mae Wild Creations yn cerfio, mowldio a chastio i greu propiau ac arddangosfeydd ar raddfa fawr i'w defnyddio mewn parciau thema byd-eang ac mewn digwyddiadau mawr ledled y byd.

Cynhyrchodd y cwmni y Bêl yn y Wal yng Nghastell Caerdydd i ddathlu Cwpan Rygbi'r Byd 2015, a draig 13 troedfedd sy'n chwythu mwg yng Nghastell Caerffili mewn cydweithrediad â Cadw.

Yn rhyngwladol, mae portffolio trawiadol Wild Creations yn cynnwys datblygu Tyrannosaurus Rex maint go iawn ar gyfer lansio'r ffilm Jurassic World – Fallen Kingdom yn 2018, a dyblygiad o'r car Dodge Charger i hyrwyddo Fast and Furious 8. Mae allforio bellach yn cyfrif am tua 90 y cant o waith y busnes.

Gyda chefnogaeth gwasanaeth Busnes Cymru, mae Wild Creations wedi creu 36 o swyddi o ansawdd uchel dros y 12 mis diwethaf, ac maen parhau i dyfu a recriwtio.

Dywedodd Matt Wild, Sylfaenydd a Chyfarwyddwr Wild Creations:

"Mae cymorth Busnes Cymru wedi bod yn wirioneddol rhagorol. Mae eu hymroddiad i helpu busnesau sy'n tyfu a busnesau newydd i ffynnu yn hynod o ysbrydoledig. Mae'n wych eu gweld yn hyrwyddo llwyddiant ar bob cam o'r daith."

Ymwelodd Rebecca Evans, Ysgrifennydd y Cabinet dros yr Economi, Ynni a Chynllunio, â'r busnes yng Nghaerdydd i weld rhai o'i brosiectau cyfredol.

Cyfarfu hefyd ag amrywiaeth o fusnesau eraill sydd wedi cael cymorth gan wasanaeth Busnes Cymru i drafod yr ecosystem cymorth busnes yng Nghymru. Trefnwyd y digwyddiad gan Business in Focus, menter gymdeithasol sy'n gyfrifol am ddarparu gwasanaethau cymorth Entrepreneuriaeth, cymorth i Fusnesau Newydd a chymorth Datblygu Busnes a Thwf i Busnes Cymru.

Dywedodd yr Ysgrifennydd Cabinet:

"Rydym yn awyddus i greu cyfleoedd newydd i fusnesau ledled Cymru - i gael mynediad i gyllid, i ddatblygu fel arweinwyr busnes, neu i oresgyn heriau.

"Mae Busnes Cymru wedi helpu busnesau ledled Cymru i lwyddo - gan gynnwys Wild Creations - ac mae ein tîm yn barod i gynnig cefnogaeth i bob busnes, bob cam o'r daith."

 Dywedodd Phil Jones, Prif Swyddog Gweithredol Business in Focus:

"Fel prif bartner cyflenwi Busnes Cymru, mae Busnes in Focus yn falch o hyrwyddo busnesau newydd a mentrau sy'n tyfu ledled Cymru, gan gynnig arweiniad arbenigol a chefnogaeth ymarferol i helpu busnesau i ffynnu, ehangu a llwyddo."