Ymrwymiad i gydweithio ar gysylltiadau Môr Iwerddon

Cyfarfu Ysgrifennydd Cabinet Cymru dros Drafnidiaeth a Gogledd Cymru Ken Skates a Gweinidog Gwladol Llywodraeth Iwerddon yn yr Adran Drafnidiaeth Sean Canney heddiw yn Nulyn i drafod gwytnwch y croesfannau rhwng Cymru ac Iwerddon, a beth arall y gellir ei wneud i'w diogelu ar gyfer y dyfodol.

Buont yn trafod cylch gorchwyl y Tasglu sydd i'w gadarnhau cyn bo hir.  Bydd pwyntiau allweddol yn cynnwys gwytnwch, cynllunio wrth gefn a datblygiadau yn y dyfodol. 

Dywedodd Ysgrifennydd y Cabinet dros Drafnidiaeth a Gogledd Cymru, Ken Skates:

"Mae'r cysylltiadau rhwng Cymru ac Iwerddon yn cael eu gwerthfawrogi'n fawr, nid yn unig am resymau economaidd ond am resymau diwylliannol hefyd.  Amlygodd cau porthladd Caergybi dros dro i bawb pa mor hanfodol yw'r cysylltiad hwn rhwng ein gwledydd.  Byddwn yn adeiladu ar yr hyn a ddysgwyd dros y misoedd diwethaf, gan ystyried pwyllgorau gwaith y Senedd a Senedd y DU, i weld beth allwn ni i gyd ei wneud i gryfhau gwytnwch y cysylltiadau rhwng Cymru ac Iwerddon a'n porthladdoedd ar gyfer y dyfodol.

"Mae'n bwysig bod mewnbwn Llywodraeth Iwerddon a diwydiant yng ngwaith y tasglu ac mae'n cynrychioli eu hanghenion hefyd, sef prif ffocws heddiw.  Rwy'n edrych ymlaen at barhau i weithio gyda'n gilydd ar y gwaith hanfodol hwn."

Meddai Gweinidog Gwladol Iwerddon dros Drafnidiaeth Ryngwladol a Ffyrdd, Logisteg, Rheilffyrdd a Phorthladdoedd, Seán Canney,

"Dwi'n falch iawn fy mod wedi cwrdd ag Ysgrifennydd y Cabinet, Ken Skates heddiw, i gadarnhau ymhellach y berthynas gref a grëwyd rhwng ein Llywodraethau yn ystod y tarfu ar borthladd Caergybi. Rwy'n croesawu sefydlu Tasglu Cymru i edrych ar sut i sicrhau gwydnwch y llwybr masnach hanfodol rhwng Dulyn a Chaergybi i'r dyfodol. Fel Gweinidog sy'n gyfrifol am Drafnidiaeth Ryngwladol a Ffyrdd, Logisteg, Rheilffyrdd a Phorthladdoedd, rwyf wedi ymrwymo i gyfrannu at waith pwysig Tasglu Cymru dros y misoedd nesaf. Bydd hyn yn sicrhau bod buddiannau Iwerddon yn cael eu nodi a'u deall, ac yn helpu i fframio argymhellion wrth sicrhau'r cysylltiad economaidd hanfodol hwn."