£5.9m o gymorth gan Lywodraeth Cymru i fusnesau sy'n buddsoddi mewn ymchwil ac arloesi

Rhoddwyd grantiau gan Gronfa Offer Cyfalaf SMART a'r Gronfa Economi Gylchol ar gyfer Busnes i gefnogi sefydliadau i fuddsoddi mewn arloesi gyda'r nod o wella bywydau pobl, tyfu'r economi a mynd i'r afael â'r argyfyngau hinsawdd a natur.

Gwahoddwyd busnesau o unrhyw faint, sefydliadau ymchwil, sefydliadau academaidd, gan gynnwys colegau addysg bellach, a sefydliadau'r trydydd sector i wneud cais am yr arian.

Mae’r buddsoddiad wedi'u targedu at weithgareddau a fydd yn helpu i gyflawni'r cenadaethau a nodir yn strategaeth arloesi Llywodraeth Cymru, Cymru’n Arloesi ac mae cymorth wedi'i gynnig i brosiectau ledled Cymru sy'n cwmpasu pob rhan o'r economi.

Maent yn cynnwys Coleg y Cymoedd yn Nantgarw, a fydd yn defnyddio'r cyllid ar gyfer canolfan newydd ar gyfer arloesi digidol, cynaliadwyedd, entrepreneuriaeth a chyfnewid gwybodaeth.

Yn y cyfamser, bydd Gwasanaeth Gwaed Cymru yn cael cymorth ar gyfer offer i ymchwilio a gwella'r amodau gweithgynhyrchu a storio sy'n effeithio ar ansawdd cydrannau gwaed gan arwain at well gofal i gleifion sy'n derbyn trallwysiadau.

Meddai Gweinidog yr Economi, Vaughan Gething:

"Arloesi sydd â'r potensial i gyfoethogi ein haddysg, ein heconomi, ein hiechyd a'n lles, a'n hamgylchedd.

"Fel y dywedais yn ddiweddar yn fy mlaenoriaethau ar gyfer economi gryfach, rwyf am gryfhau galluoedd arloesi a digidol Cymru gan gynnwys technolegau newydd sy'n esblygu'n gyflym.

"Rydym am greu a meithrin diwylliant arloesi bywiog ar gyfer Cymru gryfach, decach a gwyrddach, felly rwy'n falch ein bod wedi gallu cefnogi'r prosiectau hyn, a chredaf y byddant yn sbarduno newid trawsnewidiol."

Mewn dull trawslywodraethol, dyfarnwyd grantiau o bortffolio yr Economi a Newid Hinsawdd, gyda phrosiectau sy'n cefnogi symudiad Cymru tuag at economi garbon sero-net gylchol hefyd yn cael ei gydnabod.

Mae Fferm Wern Heulog ym Mhowys wedi cael cymorth tuag at fenter yn nalgylch dŵr Afon Gwy. Ei nod yw datblygu ffermio dofednod mwy cynaliadwy trwy ddefnyddio larfa y gleren arfog ddu i fwydo ar y sbwriel mewn amgylchedd a reolir, ei dorri i lawr a lleihau ei gyfaint - o bosibl hyd at 70%.

Dywedodd y Gweinidog Newid Hinsawdd, Julie James:

"Mae hon yn enghraifft wych o'n strategaeth Economi Gylchol, Mwy Nag Ailgylchu a'n Strategaeth Arloesi, Cymru’n arloesi yn gweithio ochr yn ochr.

"Mae symud tuag at economi gylchol yng Nghymru, lle rydym yn cynyddu'r defnydd o gynnwys wedi'i ailgylchu a'i ailddefnyddio mewn cynhyrchion neu gydrannau, neu'n ymestyn oes cynhyrchion a deunyddiau, yn rhan allweddol o'r camau gweithredu sydd eu hangen ar newid hinsawdd.

"Rwy'n falch felly ein bod wedi gallu cefnogi'r prosiectau hyn a'r cyfleoedd economaidd a ddaw yn eu sgil tra ar ein taith tuag at ddyfodol mwy cynaliadwy a Chymru ddiwastraff, garbon isel."